चारपटकको विश्व विजेता इटाली विश्वकपमा छनौट हुन सकेन, ६० वर्षपछि इटालीबिहीन विश्वकप

लाइट नेपाल

काठमाडौं, २८ कात्तिक ।  चारपटकको विश्व विजेता इटाली आउँदो वर्षको विश्वकप फुटबलमा छनौट हुन असफल भएको छ । सोमबार राति भएको विश्वकप छनौटका लागि युरोपियन क्षेत्रको प्ले–अफ अन्तर्गत दोस्रो लेगमा स्वीडेनसँग गोलरहित बराबरीमा रोकिएपछि इटालीको विश्वकप खेल्ने संभावना सकिएको हो । स्वीडेनसँगको पहिलो लेगमा १–० ले पराजित भएको इटाली दोश्रो लेगमा बराबरीमा रोकिएको हो ।

इटाली सन् १९५८ पछि (६० वर्षमा) पहिलोपल्ट विश्वकपमा छनौट हुन असफल भएको हो । सन् १९३० को पहिलो विश्वकप खेल्न अस्वीकार गरेको इटाली १९५८ बाहेकका सबै संस्करणमा छनौट हुँदै आएको थियो । सन् १९३४, १९३८, १९८२ र २००६ को विश्वकप विजेता इटाली १९७० र १९९४ मा उपविजेता बनेको थियो । समग्रमा इटालीलाई १–० ले हराउँदै

 

स्वीडेन १२ औं पल्ट विश्वकपमा छानिएको हो ।

 

सन् १९५८ को उपविजेता स्वीडेनले पछिल्लो पल्ट सन् २००६ को विश्वकप खेलेको थियो । १२ वर्षपछि विश्वकपमा पुनरागमन गर्ने क्रममा जियानलुइजी बुफोनको क्लब इटालीलाई स्वीडेनले निराश पार्‍यो । अवे मैदानमा पराजित भएको इटालीले घरेलु मैदानमा भएको दोस्रो लगेमा गोल गर्न नसक्दा विश्वकप यात्रा तय गर्न सकेन । खेल अवधिभर अधिकांश समय बलमा नियन्त्रण रहेर पनि इटालीले बललाई विपक्षीको पोस्टमा प्रहार गर्न भने सकेन । इटालीलाई गोल गर्न नदिनु नै स्वीडेनका लागि विश्वकप यात्रा तय गर्ने बाटो बन्यो ।

इटालीले २७ पटकसम्म पोस्ट प्रहार गरे पनि त्यो गोलमा परिणत भने हुन सकेन । विश्वफुटबलमा आफ्नो उत्कृष्ट खेल कौशल तथा भव्य व्यक्तित्वको परिचय बनाएका इटालीका कप्तान तथा गोलरक्षक बुफोनका लागि अन्तिम खेल निकै निराशाजनक बन्यो । ३९ वर्षका बुफोनले यो सिजनको अन्त्यसँगै फुटबलबाट सन्यास लिने घोषणा गरिसकेका ले स्वीडेनसँगको खेल नै उनको अन्तिम अन्तर्राष्ट्रिय खेल बन्यो ।

Advertisements
© 2016 लाइट नेपाल मिडिया प्रा.लि.
Designed by appharu.com